Өз укугуңду бил: Конституция күнүнө карата өлкө боюнча акысыз юридикалык акция өтөт

Кыргыз Республикасынын Конституция күнүнө карата өлкө боюнча масштабдуу укуктук акция өтөт. 30-апрелде Юридикалык жардам кызматы башка мамлекеттик органдар менен биргеликте атайын аянтчаларды уюштуруп, ар бир жаранга акысыз юридикалык кеңеш алууга жана өзүн кызыктырган суроолорду берүүгө мүмкүнчүлүк түзөт.

Акция республиканын бардык аймактарын камтып, жарандар үчүн ар кандай укуктук маселелер боюнча адистерге түз кайрылууга шарт түзөт — социалдык төлөмдөрдөн тартып эмгек талаштарына, документтерди тариздөө жана укуктарды коргоого чейин.

Иш-чаранын негизги максаты — калктын укуктук сабаттуулугун жогорулатуу жана юридикалык жардамды жеткиликтүү кылуу. Бүгүнкү күндө көптөгөн жарандар укуктук маселелерге туш болуп жаткан шартта, мындай демилгелер кошумча чыгымсыз жана ашыкча тоскоолдуксуз кесипкөй кеңеш алууга мүмкүнчүлүк берет.

Жарандарды акцияга активдүү катышууга жана адистер менен бирге өз укуктары жана милдеттери тууралуу кеңири маалымат алууга чакырабыз.